Dakota Bible Home

Dakota Wowapi Wakan, Johannes Tokaheya(I John)

_________________________

JOHANNES TOKAHEYA(I John)

Tawowapi Tokaheya Kin.

WICOWOYAKE 1.

1 Taku otokaheya tanhan un, taku naunĥonpi, qa išta on wanunyakapi, oaunĥtapi qa nape on unzapi, Wiconi Oie kin hee.

2 Wiconi kin he ihdutanin; unkan Wiconi Owihanke Wanica Ateyapi kin kici un, qa unkiyepi kin en ihdutanin qon he wanunyakapi, qa unyaotaninpi qa unkoniciyakapi.

3 Taku wanunyakapi qa naunĥonpi kin he unkoniciyakapi, hecen niye unyecicapi kta; unkan awicakehan Ateyapi kin kici okiciciya unyakonpi, qa nakun iye Cinhintku Jesus Messiya kici.

4 Unkan nitowiyuškinpi kin yucopi kta e heon dena decen wowapi unnicagapi.

5 Hehan wotanin wašte iye eciyatanhan naunĥonpi qa unkoniciyakapi kin, Wakantanka he iyoyanpa, qa otpaza takudan en un šni kin he hee.

6 Iye kici okiciciya unyakonpi ce, unkeyapi qa otpaza kin omaunnipi kinhan, unkitonpišni qa wowicake kin econkupi šni ece.

7 Tuka iye iyoyanpa en un kin he iyecen iyoyanpa kin en maunnipi kinhan, otoiyohi okiciciya unyakonpi, qa iye Cinhintku Jesus Messiya we kin he woaĥtani owasin unkipakintapi kta.

8 Woaĥtani unnicapi ce, unkeyapi kinhan, unkicihnayanpi qa wowicake kin unkiyepi en un šni.

9 Tuka waunĥtanipi kin unkohdakapi kinhan, iye kin wacinyepica qa owotanna un, hecen woaĥtani yutokan iyeunkiciciyapi kta, qa taku šica owasin unkipakintapi kta.

10 Eca waunĥtanipi šni ce, unkeyapi kinhan, iye itonšni undakapi, qa iye oie kin unkiyepi en un šni ece.

WICOWOYAKE 2.

1 Micinca cikcistinpidan wayaĥtanipi kte šni e heon dena decen wowapi cicagapi. Unkan tuwe waĥtani kinhan Ateyapi kin ekta Wawiciya wan unhapi, Jesus Messiya owotanna kin hee.

2 Unkan waunĥtanipi wokajuju kin he iye; qa unkiye unkitawapi kin hecedan šni, tuka maka kin owancaya woaĥtani econpi kin hena.

3 Unkan deciyatanhan iye kin wanna sdonunyanpi e sdonunkiyapi, tawoahope unkokicipapi kinhan.

4 Tuwe, He sdonwaya ce, eye ca tawoahope okicipe šni kin he itonšni, qa wowicake kin en un šni.

5 Tuka tuwe iye oie kin okicipe cinhan, awicakehan he en Wakantanka waštedake cin yuecetupi. Heciyatanhan iye kin en unyakonpi kin sdonunkiyapi ece.

6 Tuwe he kici un keye cinhan, iye token omani qon iš iyecen omani kta iyececa.

7 Mihunkawanji, woahope teca wan cicagapi šni, tuka woahope tanina, otokaheya tanhan duhapi qon hee. Woahope tanina kin wicoie otokahe ekta nayaĥonpi qon he hee.

8 Hehan akeš woahope teca wan cicagapi; he iye kin en wowicake, qa nakun niyepi kin en; otpaze cin he wanna henakeca, qa iyoyanpa wicake cin he wanna tanin kin heon etanhan.

9 Tuwe iyoyanpa kin en un keiciye ca, hunkawanjitku kin šicekidake cin he dehantu otpaza kin en un.

10 Tuwe hunkawanjitku waštekidake cin he iyoyanpa kin en un ece, qa wokašeye takudan en un šni.

11 Tuka tuwe hunkawanjitku šicekidake cin he otpaza en un, qa otpaza omani, qa tokiya ye cin sdonkiye šni, išta kin otpaza kašeya, heon etanhan.

12 Hokšiyopa cikcistinpidan, iye caje kin on wayaĥtanipi kin nicigajujupi kin heon wowapi cicagapi.

13 Hunkakeniyanpi kin, tuwe otokaheya tanhan un kin he sdonyayapi kin heon wowapi cicagapi. Koškapi kin, tuwe šice cin he ohiyayapi kin heon wowapi cicagapi.

14 Hokšiyopa cikcistinpidan, Ateyapi kin sdonyayapi kin he etanhan wowapi cicagapi. Hunkakeyapi kin tuwe otokaheya tanhan kin he iye sdonyayapi kin heon wowapi cicagapi. Koškapi kin, wanišakapi, qa Wakantanka oie kin en niunpi, qa tuwe we šice cin he yaktepidan kin he etanhan wowapi cicagapi.

15 Wicoicage kin de waštedapi šni po, qa taku wicoicage kin ekta un kin hena nakun. Tuwe wicoicage kin de waštedake cinhan, Ateyapi kin waštedake cin en un šni.

16 Taku wicoicage en un kin owasin, wicaceĥpi cantiheye cin, wicaišta cantiheye cin, qa wiconi kin den waĥanicidapi kin, hena Ateyapi kin etanhan šni, tuka wicoicage kin de etanhan.

17 Unkan wicoicage kin de atakuni kte šni, qa wocantiheye kin nakun; tuka tuwe Wakantanka tawacin kin yuhe cinhan, he owihanke wanin ounye kta.

18 Hokšiyopa cikcistinpidan, anpetu ihankeya kin wanna hiyohi; unkan, Messiya kipajin kin he u kta ce, nayaĥonpi qon he iyecen Messiya kipajinpi kin ota wanna hipi; heon de anpetu ehake kin sdonunyanpi.

19 Unkiyepi kin etanhan inanpapi, tuka hena unkicicapi šni. Hena unkicicapi unkanš, unkici pi un wacinpi kta: tuka owasin unketanhanpi šni tanin kta e heon etanhan hececa.

20 Tuka Wanji Wakan kin he niye sdaniyanpi, qa heon taku owasin sdonyayapi.

21 Wowicake kin sdonyayapi šni kin heon wowapi cicagapi šni; tuka he sdonyayapi, qa woitonšni takudan wowicake kin eciyatanhan u šni, heon etanhan.

22 Tuwe itonši he; tuwe Jesus he Messiya kin ee šni, keye cin hee; Messiya kipajin kin hee, Ateyapi qa nakun Cinhintku kin anawicakiĥbe cin hee.

23 Tuwe Cinhhintkuyapi kin wicada šni kin he Ateyapi kin yuhe šni: tuka tuwe Cinhintkuyapi kin oyake cinhan, he Ateyapi kin nakun yuha ece.

24 Taku otokaheya tanhan nayaĥonpi qon he yuha po. Taku otokahe ekta nayaĥonpi qon en niunpi kinhan, Cinhintkuyapi kin en yaunpi kta, qa nakun Ateyapi kin en.

25 Unkan wahoyapi qon taku iwahounyanpi kin, owihanke wanin wiconi kin hee.

26 Tona nihnayanpi kta cinpi kin hena on decen wowapi cicagapi.

27 Tuka sdaniyanpi, iye eciyatanhan duhapi kin he nicipi un; qa tuwe waonspeniciyapi kta iyenicecapi šni; tuka sdaniyanpi kin he taku owasin onspeniciyapi, he wowicake qa woitonšni wanica; he taku onspeniciyapi kin iyecen, iye kin en unn po.

28 Unkan dehan, hokšiyopa cikcistinpidan, iye kici un po; hecen tohan iye ihdutanin kinhan wacinunyanpi kta, qa taninyan hinajin kinhan, itokam unkištecapi kte šni.

29 Iye owotanna un sdonyayapi kinhan, tuwe woowotanna econ kin he iye kin eciyatanhan wanna teca nien tonpi e nakun sdonya po.

WICOWOYAKE 3.

1 Wanyaka po, Ateyapi kin wocantekiye hinsko tanka unqupi kin, Wakantanka cinca unkekiciyapi kta: heon etanhan wicoicage kin sdonunyanpi šni, iye kin sdonyapi šni qon iyececa.

2 Waštecicidapi kin, wanna Wakantanka cinca kin heuncpi; qa tounkecapi kte cin hinaĥin tanin šni: tuka iye kin ihdutanin kinhan, iyeuncecapi kta e sdonunkiyapi; he token un kin wanunyakapi kta nakaeš.

3 Unkan tuwe hecen wacinyan canteyuze cinhan ihduecedan ece, iye kin ecedan un kin iyecen.

4 Tuwe woaĥtani econ kin he woope kin kicaksa ece; woaĥtani he woope kicaksapi kin hee.

5 Unkan iye ihdutanin qon, waunĥtanipi kin yutokan iyeye kta e heon, he sdonyayapi; qa iye kin woaĥtani takudan en un šni.

6 Tuwe iye en un kin he waĥtani šni; tuwe waĥtani ece kin he iye kin tohinni wanyake šni, qa nakun sdonye šni.

7 Hokšiyopa cikcistinpidan, ihnuhan tuwe nihnayanpi kinhan; tuwe taku owotanna econ ece kin he owotanna, iye kin owotanna un kin iyececa.

8 Tuwe woaĥtani econ ece kin he wakanšica eciyatanhan un; otokaheya tanhan wakanšica kin waĥtani ece. Heon etanhan Wakantanka Cinhintku kin ihdutanin, wakanšica oĥan kin ihangye kte cin heon.

9 Tuwe Wakantanka eciyatanhan teca nien tonpi kin he woaĥtani econ šni, taku on icaĥye cin he en un kin heon; unkan waĥtani okihi šni, Wakantanka eciyatanhan teca nien tonpi kin he etanhan.

10 Detanhan Wakantanka cinca kin sdonwicayapi, qa nakun wakanšica cinca kin; tuwe taku owotanna ece econ šni kin he Wakantanka eciyatanhan šni, qa nakun tuwe hunkawanjitku tanyan cante kiyuze šni kin.

11 Otokaheya tanhan taku iwahokonunkiciyapi nayaĥonpi qon he dee, otoiyohi wašteunkicidakapi kte cin.

12 Qain taku šice cin eciyatanhan un, qa iye sunkaku kikte qon iyecece šni. Unkan taku on kikte he. Iye kin oĥan šica, qa sunkaku kin wašte kin heon etanhan.

13 Mihunkawanji, wicoicage kin šicenidapi ešta inihanpi šni po.

14 Hunkawanjinkiciyapi waštewicunkidapi kin heon wiconte etanhan wiconi e ekta unkiyohipi sdonunkiyapi; tuwe hunkawanjitku waštekida šni kin he wiconte ehna un.

15 Tuwe hunkawanjitku šicekidake cin he tinwicakte kin heca; unkan tuwe tinwicakte kin he wiconi owihanke wanica aihduhe šni e sdonyayapi.

16 Deciyatanhan wacantkiyapi kin sdonunyanpi; iye kin unkiyepi on wiconi eĥpekiye cin heon; hecen unkiš eya hunkawanjinkiciyapi kin on wiconi eĥpeunkiyapi kta iyececa.

17 Tuka tuwe maka akan woyuha ton, qa hunkawanjitku waĥpanica wanhdake ca, cantekiye cin anakipte cinhan, tooken Wakantanka waštedake cin en un kta he.

18 Micinca cikcistinpidan, wicoie qa wicaceji ecedan on wacanunkiyapi kte šni, tuka wicoĥan qa wowicake kin on.

19 Unkan deciyatanhan wowicake eciyatanhan unyakonpi, qa iye itohnake kin en cante unhdutinzapi kta e sdonunkiyapi.

20 Uncantepi kin unhdacopi kinhan, Wakantanka uncantepi kin sam iyeya tanka, qa taku owasin sdonya un.

21 Waštecicidapi kin, uncantepi kin unhdacopi šni kinhan, Wakantanka ekta wowaditake kin unhapi:

22 Qa taku unkidapi kin owasin unkicupi ece, tawoahope kin unkiciyuhapi, qa taku iye išta kin en iyokipi kin he econkupi, heon etanhan.

23 Unkan tawoahope kin he dee, Iye Cinhintku Jesus Messiya caje kin wacinunyanpi, qa otoiyohi wašteunkicidapi kta, econ unšipi qon iyececa.

24 Tuwe tawoahope kin ope cinhan, he Wakantanka kici un, qa iš iye kin en un; unkan Woniya unqupi kin he eciyatanhan iye unkicipi un kin he sdonunyanpi ece.

WICOWOYAKE 4.

1 Waštecicidapi kin, ihnuhan woniya owasin wicayadapi kinhan; tuka woniya kin wicayukcan po, Wakantanka etanhan unpi kinhan; wicašta wokcan itonpišni ota wanna wicoicage kin ehna iyayapi.

2 Deciyatanhan Wakantanka Taniya kin sdonyayapi kta; woniya kin tona Jesus Messiya wicaceĥpi un hi oyake cin hena Wakantanka eciyatanhanpi ece.

3 Qa woniya kin tona Jesus Messiya wicaceĥpi un hi oyake šni kin hena Wakantanka eciyatanhanpi šni; tuka Messiya kipajin u kta nayaĥonpi qon he dee, wanna wicoicage kin en un.

4 Hokšiyopa cikcistinpidan, Wakantanka eciyatanhan yaunpi, qa hena ohiwicayayapi; tuwe en niunpi kin he tuwe wicoicage en un kin isanpa tanka.

5 Hena e wicoicage kin etanhanpi; heon wicoicage kin iyecen iapi, unkan wicoicage kin anawicagoptan ece.

6 Unkiye Wakantanka unketanhanpi; tuwe Wakantanka sdonye cin he unkiye anaungoptanpi ece; qa tuwe Wakantanka eciyatanhan šni kin he anaungoptanpi šni. Deciyatanhan wowicake woniya qa wohnaye woniya kin napin sdonunyanpi.

7 Waštecicidapi kin, otoiyohi canteunkiciciyapi kte; wacantkiyapi kin he Wakantanka eciyatanhan un; qa tuwe wacantkiye cin he Wakantanka eciyatanhan tonpi, qa Wakantanka sdonya.

8 Tuwe wacantkiye šni kin he Wakantanka sdonye šni; Wakantanka he wacantkiyapi kin hee.

9 Wakantanka canteunkiyapi kin he deciyatanhan tanin, Wakantanka iye Cinhintku išnana icage cin he makata u ši, heciyatanhan unnipi kta e heon.

10 Wacantkiyapi kin he deciyatanhan, unkiye Wakantanka wašteundakapi kin hee šni, tuka iye canteunkiyapi, qa Cinhintku waunĥtanipi yutokan iyeye kta e on u ši qon hee.

11 Waštecicidapi kin, Wakantanka hecen canteunkiyapi kinhan, unkiš eya otoiyohi canteunkiciciyapi kta iyececa.

12 Tuwedan tohinni Wakantanka wanyake šni. Otoiyohi canteunkiciciyapi kinhan Wakantanka unkicipi un, qa iye canteunkiyapi kin unkiyepi en tanyan yuštanpi ece.

13 Heciyatanhan unkiye kici unyakonpi, qa iye unkicipi un kin sdonunyanpi ece, iye Taniya unqupi kin heon.

14 Unkan wanunyakapi, qa Ateyapi kin Cinhintku ukiya, wicoicage kin ekta, Wanikiya hee kta e he unyaontaninpi.

15 Tuwe Jesus he Wakantanka Cinhintku kin hee e oyake cin he kici Wakantanka un, qa iš eya Wakantanka en un ece.

16 Wakantanka canteunkiyapi kin he sdonunyanpi qa wicaundapi. Wakantanka wacantkiyapi kin hee; qa tuwe wacantkiyapi en un kin he Wakantanka kic un, qa Wakantanka iš nakun iye en un ece.

17 Deciyatanhan wocantekiye unkiyepi en unkiciyuštanpi ece, hecen woyaco anpetu kin en wowaditake unhapi kta: iye un kin unkiš iyecen wicoicage kin den unyakonpi ece.

18 Wacantkiyapi kin en wokokipe wanica, tuka wacantkiyapi yuštanpi kin he wokokipe tankan eĥpeya ece; wokokipe kin he wicocante šica yuha ece; tuwe wakokipe cin he nahanĥin wacantkiyapi kin en yuštanpi šni.

19 Iye tokaheya canteunkiyapi kin heon unkiye Wakantanka wašteundakapi.

20 Tuwe, Wakantanka waštewadaka ce, eye ca hunkawanjitku šicekidake cinhan, he itonšni. Tuwe hunkawanjitku wanhdake cin he waštekidake šni kinhan, token ecin Wakantanka wanyake šni kin waštedaka okihi kta he.

21 Unkan iye etanhan woahope kin de unhapi; tuwe Wakantanka waštedake cin he hunkawanjitku kin iš nakun waštekidake kta ce.

WICOWOYAKE 5.

1 Tuwe Jesus he Messiya kin ee e wicada kin he Wakantanka eciyatanhan tonpi; qa tuwe waicaĥye cin waštedake cinhan, he tuwe iye eciyatanhan teca ni en tonpi kin he nakun waštedaka ece.

2 Deciyatanhan Wakantanka cinca kin waštewicundakapi kin sdonunkiyapi, Wakantanka wašteundakapi qa tawoahope kin tanyan unkiciyuhapi kinhan.

3 Wakantanka waštedakapi kin he dee, tawoahope kin tanyan ounpapi kin he; unkan tawoahope kin wošitkihda šni.

4 Tuwe Wakantanka eciyatanhan tonpi kin he wicoicage kin ohiya ece; unkan woohiye wicoicage ohiye cin he dee, wacinunyanpi kin hee.

5 Wicoicage ohiya ece kin he tuwe he; tuwe Jesus he Wakantanka Cinhintku kin ee e wicada kin hee.

6 Tuwe mini qa we eciyatanhan hi qon he Jesus Messiya ee; mini ecedan on hi šni, tuka mini we ahna. Unkan wayaotanin kin he Woniya kin hee; Woniya kin he wowicake, heon etanhan.

7 Maĥpiya kin ekta yamni wayaotaninpi ece, Ateyapi kin, Wicoie kin, qa Woniya Wakan kin; unkan hena yamni wanjipidan.

8 Nakun maka akan taku yamni wayaotanin ece, Woniya kin, qa mini kin, qa we kin; unkan hena yamni wanjidan en un.

9 Wicašta akantu taku yaotaninpi kin he unkicupi kinhan, Wakantanka taku yaotaninpi kin he iyotan tanka; Wakantanka taku yaotanin kin he dee, iye Cinhintku hdaotanin qon hee.

10 Tuwe Wakantanka Cinhintku kin wicada kin he wayaotanin iye atayedan yuha un. Tuwe Wakantanka wicada šni kin he itonšni daka ece; wayaotanin kin on Wakantanka iye Cinhintku hdaotanin qon he wicada šni kin heon.

11 Unkan wayaotanin qon he dee, Wakantanka wiconi owihanke wanica unqupi kin he; unkan wiconi kin he iye Cinhintku kin en un.

12 Tuwe Cinhintkuyapi kin yuhe cin he wiconi yuha; qa tuwe Wakantanka Cinhintku kin yuhe šni kin he wiconi yuhe šni.

13 Wakantanka Cinhintku caje kin wacinyayapi kin dena wowapi cicagapi kin; wiconi owihanke wanica duhapi e sdonyakiyapi kta, qa Wakantanka Cinhintku caje kin wacinyayapi kta e heon.

14 Unkan iye ekta wowaditake unhapi kin he dee, Iye tawacin kin eciyatanhan taku unkidapi eca naunkiĥonpi ece:

15 Qa taku unkidapi ece naunkiĥonpi ece e sdonunkiyapi kinhan, taku tona unkidapi kin hena unhapi e nakun sdonunkiyapi ece.

16 Tuwe hunkawanjitku waĥtani wanhdake cinhan, woaĥtani kin he wiconte ekta šni kinhan, wocekiye ekiciye kta, unkan Wakantanka wiconi qu kta, tona waĥtanipi wiconte ekta iyahde šni hena on. Woaĥtani wanji wiconte ekta; he on wocekiye eye kta epe šni.

17 Taku šica econpi kin owasin woaĥtani; unkan woaĥtani wiconte iyohi šni kin heca yukan.

18 Tuwe Wakantanka eciyatanhan tonpi kin he waĥtani šni ece e sdonunyanpi; tuka tuwe Wakantanka eciyatanhan icage cin he tanyeĥ ihduhe ca hecen taku šice cin he oyutan šni ece.

19 Wakantanka eciyatanhan unyakonpi kin he sdonunkiyapi; qa wicoicage kin ocowasin woaĥtani en wanka.

20 Unkan Wakantanka Cinhintku kin he hi, qa wicoksape unqupi, on tuwe wicake cin iyeunkiyapi kta e sdonunyanpi; unkan tuwe wicake cin he en unyakonpi, iye Cinhintku Jesus Messiya hee. Wowicake Wakantanka qa owihanke wanin wiconi kin hee.

21 Hokšiyopa cikcistinpidan, taku wakagapi kin itehan ihduha po. Amen.

_________________________


Dakota Bible Home